తిరుమలలో జరుగుతున్న శ్రీవారి సాలకట్ల బ్రహ్మోత్సవాల్లో( Salakatla Brahmotsavams) చివరి రోజైన మంగ‌ళ‌వారం ఉదయం చక్రస్నానం వైభవంగా జరిగింది. కన్నుల పండువగా జరిగిన చక్రస్నాన ఘట్టాన్ని చూసేందుకు భక్తులు విశేష సంఖ్యలో తరలివచ్చారు. శ్రీవారి పుష్కరిణిలో పుణ్యస్నానాలు ఆచరించారు. చక్రస్నాన ఘట్టానికి ముందు తెల్లవారుజామున 3 నుండి 6 గంటల వరకు స్వామివారికి పల్లకీ ఉత్సవం నిర్వహించారు. ఉదయం 6 నుంచి 9 గంటల మధ్య శ్రీ భూ వరాహస్వామి ఆలయం ముఖ మండపంలో శ్రీదేవి, భూదేవి సమేత శ్రీమలయప్పస్వామి వారికి, శ్రీ సుదర్శన చక్రత్తాళ్వార్లకు స్నపనతిరుమంజనం నిర్వహించారు. ఇందులో భాగంగా ముందుగా విష్వక్సేనారాధన, పుణ్యహవచనం, ముఖ ప్రక్షాళన, ధూపదీప నైవేద్యం, ఛత్ర ఛామర వ్యజన దర్పణాది నైవేద్యం, రాజోపచారం నిర్వహించారు. అర్ఘ్యపాద నివేదనలో భాగంగా పాలు, తేనె, కొబ్బరినీళ్లు, పసుపు, గంధంతో స్నపనం నిర్వహించారు. వీటిని శంఖనిధి, పద్మనిధి, సహస్రధార, కుంభధారణలతో వైఖానస ఆగమయుక్తంగా స్నపనం నిర్వహించారు.
ఈ సందర్భంగా… ఉపనిషత్తు మంత్రములు, దశశాంతి మంత్రములు, పురుషసూక్తం, శ్రీసూక్తం, భూసూక్తం, నీలాసూక్తం, విష్ణుసూక్తం వంటి పంచసూక్త మంత్రములు, దివ్యప్రబంధంలోని అభిషేక సమయంలో అనుసంధానము చేసే వేదాలను టీటీడీ వేదపారాయణదారులు పారాయణం చేశారు. అభిషేకం తర్వాత వివిధ పాశురాలను.. పెద్ద‌జీయ‌ర్‌స్వామి, చిన్న‌జీయ‌ర్‌స్వామివారి శిష్య‌బృందం పఠించారు. ఈ వేడుకలో ఒక్కో క్రతువులో ఒక్కో రకమైన ఉత్తమ జాతి పుష్ప మాలలను స్వామి, అమ్మవార్లకు అలంకరించారు. శ్రీవారి ఆల‌య ప్ర‌ధాన అర్చ‌కులు శ్రీ అర్చ‌కం రామ‌కృష్ణ దీక్షితులు ఆధ్వ‌ర్యంలో ఈ కార్య‌క్ర‌మం జరిగింది.
తొమ్మిది రోజుల ఉత్సవాల్లో జరిగిన అన్ని సేవలూ సఫలమై లోకం క్షేమంగా ఉండాలని, భక్తులు సుఖశాంతులతో ఉండాలని… చక్రస్నానం నిర్వహిస్తారు. ఉత్సవాలు ఒక యజ్ఞమే కనుక.. యజ్ఞాంతంలో అవభృథస్నానం చేస్తారు. యజ్ఞ నిర్వహణలో జరిగిన చిన్నచిన్న లోపాల వల్ల ఏర్పడే దుష్పరిణామాలు తొలగి, అన్నీ సంపూర్ణ ఫలాలు చేకూరడం కోసం చేసే దీక్షాంతస్నానమే అవభృథం. ఈ ఉత్సవాలు చేసిన వారికి, చేయించిన వారికి, ఇందుకు సహకరించిన వారికి, దర్శించిన వారికి.. అందరికీ ఈ ఉత్సవ యజ్ఞఫలం లభిస్తుంది.
చక్రస్నానం కార్య‌క్ర‌మంలో టీటీడీ ఛైర్మ‌న్ భూమ‌ణ క‌రుణాక‌ర్‌రెడ్డి దంప‌తులు, ఎంపీ వేమిరెడ్డి ప్ర‌భాక‌ర్‌రెడ్డి దంప‌తులు, టీటీడీ ఈవో ధ‌ర్మారెడ్డి దంప‌తులు, జిల్లా క‌లెక్ట‌ర్ శ్రీ వెంక‌ట‌ర‌మ‌ణారెడ్డి, జేఈవోలతోపాటు… ధ‌ర్మ‌క‌ర్త‌ల మండ‌లి స‌భ్యులు, ఇతర అధికారులు, ప్రముఖులు పాల్గొన్నారు. భక్తులు పెద్దసంఖ్యలో చక్రస్నానం వేడుకలో పాలుపంచుకున్నారు. ఆ తర్వాత పుష్కరిణిలో పుణ్యస్నానాలు ఆచరించారు. బ్రహ్మోత్సవాల్లో పాలు పంచుకున్నవారికి సమస్త పాపవిముక్తి కలుగుతుందని, ధనధాన్య సమృద్ధితో తులతూగుతారని నమ్మకం. ఈరోజు రాత్రి 7గంటల నుంచి 9 గంటల మధ్య బంగారు తిరుచ్చి ఉత్సవం జరిగింది. రాత్రి 9 నుండి 10 గంటల మధ్య ధ్వజావరోహణంతో శ్రీ వారి బ్రహ్మోత్సవాలు ఘనంగా ముగిశాయి.
