శ్రీహరికోట వద్దనున్న సతీష్ ధావన్ అంతరిక్ష కేంద్రం నుండి జాబిల్లి ఉపరితలాన్ని తాకేందుకు ఇస్రో ప్రతిష్టాత్మకంగా పంపించిన ‘చంద్రయాన్ -3’ బుధవారం చంద్రుడిని తాకనుంది. ఈ క్రమంలో చంద్రయాన్-3 ప్రయోగాన్ని కించపర్చేలా సోషల్‌ మీడియాలో పోస్టు పెట్టిన నటుడు ప్రకాశ్‌ రాజ్‌పై కేసు నమోదు అయింది. కర్ణాటక రాష్ట్రం బాగల్‌కోట్‌ జిల్లాలోని బనహట్టి పోలీస్‌స్టేషన్‌లో హిందూ సంస్థల నాయకులు ఆయనపై కేసు ఫైల్ చేశారు. ప్రకాష్ రాజ్ పై వెంటనే తగిన చర్యలు తీసుకోవాలని డిమాండ్‌ చేశారు. దాంతో బనహట్టి పోలీసులు కేసు నమోదు చేసి దర్యాప్తు చేపట్టారు.
నటుడు ప్రకాష్‌రాజ్‌ గత ఆదివారం సోషల్‌ మీడియా ప్లాట్‌ ఫామ్ ఎక్స్‌ (X) లో ఒక కార్టూన్‌ను పోస్ట్‌ చేశాడు. కార్టూన్‌లో అంగీ, లుంగీతో ఉన్న ఓ వ్యక్తి స్టెయిల్‌ లెస్ట్‌ స్టీల్‌ జెగ్గులోంచి చాయ్‌ను స్టైల్‌గా గ్లాసులో పోస్తున్నట్టుగా ఉంది. ఆ పోస్టుతోపాటు ‘బ్రేకింగ్‌ న్యూస్: చంద్రయాన్ పంపిన తొలి చిత్రం ఇదే’ అని కామెంట్‌ చేశాడు. ఈపోస్టుపై సోషల్‌ మీడియాలో కూడా విమర్శలు వెల్లువెత్తుతున్నాయి. చంద్రుడిఉపరితలాన్ని తాకేందుకు శాస్త్రవేత్తలు అనేక ప్రయోగాలు చేస్తున్నారని.. మూన్‌ మిషన్‌ దేశానికి గర్వ కారణమని, అలాంటి ప్రయోగాన్ని ప్రకాష్ రాజ్ ఎగతాళి చేయడం దారుణమని మండిపడుతున్నారు. ఈ క్రమంలో ప్రకాష్ రాజ్ వివరణ ఇస్తూ చంద్రయాన్-3 ని ఎగతాళి చేయాలన్నది తన ఉద్దేశం కాదని, కేవలం జోక్‌ కోసమే ఆ పోస్ట్‌ పెట్టానని పేర్కొన్నాడు. అయినా, ఎదుటి మనిషి మీద జోకులు వేసినట్టు మాతృభూమి మీద జోకులు వేయడం కరెక్ట్‌ కాదని నెటిజన్‌లు తీవ్ర విమర్శలు గుప్పిస్తున్నారు.
