హైదరాబాద్(Hyderabad) గాంధీనగర్‌లో విషాదకర ఘటన జరిగింది. హుస్సేన్ సాగర్(Hussain Sagar) నాలాలో పడి లక్ష్మీ(laxmi) అనే మహిళ గల్లంతయ్యింది. సంజీవయ్య నగర్‌లో ఉండే లక్ష్మి (55) నాలాపై ఇల్లు నిర్మించుకుంది. ఇటీవల వర్షానికి ఇంటి గోడ కూలిపోగా.. ఈ రోజు ఉదయం నుంచి ఆమె కనిపించకుండా పోయింది. అయితే ఆమె నాలాలో పడి కొట్టుకుపోయి ఉంటుందని స్థానికులు అనుమానం వ్యక్తం చేస్తున్నారు. ఇవాళ ఉదయం ఆమె ఇంట్లోకి వెళ్తున్న దృశ్యాలు సమీపంలోని సీసీ కెమెరాల్లో రికార్డయ్యాయి. ఇంట్లోకి వెళ్లిన లక్మ్షి ఆ తర్వాత కనిపించకండా పోయింది. నాలా దగ్గర లక్ష్మి చేతి గాజులను కుటంబ సభ్యులు గుర్తించారు. కుటుంబ సభ్యుల ఫిర్యాదు మేరకు కేసు నమోదు చేసుకున్న పోలీసులు విచారణ చేపట్టారు. రెస్క్యూ టీం(Rescue team) గాలింపు చర్యలు చేపట్టింది. అయితే ఆమె నాలాలో పడి గల్లంతయ్యిందా? లేక ఎక్కిడైకినా వెళ్లిందా? తెలియాల్సి ఉంది.
తెలంగాణ(Telangana) వ్యాప్తంగా వర్షాలు దంచికొడుతున్నాయి. కామారెడ్డి జిల్లాలో వాగులు వంకలు పొంగిపొర్లుతున్నాయి. ఇక హైదరాబాద్‌లోనూ ఇవాళ ఉదయం నుంచి వర్షం కురుస్తోంది. ఎడతెరిపిలేని వర్షంతో నగరం తడిసిముద్దయింది. నగరంలోని పలు ప్రాంతాల్లో భారీ వర్షం కురుస్తోంది. చందానగర్, మియాపూర్, గచ్చిబౌలి, మాదాపూర్ ప్రాంతాల్లో వర్షం దంచికొడుతోంది. కూకట్‌పల్లి, ప్రగతి నగర్, నిజాంపేట, బాచుపల్లి, అమీర్‌పేట, మైత్రివనం, పంజాగుట్ట, బంజారాహిల్స్, జూబ్లీహిల్స్ ప్రాంతాల్లో ముసురు పడుతోంది.
సికింద్రాబాద్ కంటోన్మెంట్,సుచిత్ర, కొంపల్లి, దూలపల్లి, దుందిగల్, గండిమైసమ్మ, మల్లంపేట్, బౌరంపేట్, బాహుదూర్ పల్లి, సురారం, జీడిమెట్ల, షాపూర్ నగర్, చింతల్, గాజులరామారం, జగద్గిరిగుట్టు, అటు పటాన్ చెరు, రామచంద్రాపురం, అమీన్పూర్, దిల్‌సుఖ్ నగర్, ఎల్బీ నగర్, వనస్థలిపురం ప్రాంతాల్లో చిరుజల్లులు పడుతున్నాయి. ఆగకుండా కురుస్తున్న వర్షంతో పలు ప్రాంతాల్లో రోడ్లపైకి భారీగా వరద నీరు చేరింది. దీంతో వాహనదారులు ఇబ్బందులు పడుతున్నారు. పలు చోట్ల రోడ్లపై భారీగా ట్రాఫిక్ జామ్ అయింది. పలు కాలనీల్లోకి భారీగా వరద నీరు చేరింది. దీంతో ఆయా ప్రాంతాల్లో అధికారులు విద్యుత్ సరఫరా నిలిపేశారు.
