ఓలా ఎలక్ట్రిక్ స్కూటర్ కొనుగోలు చేయాలని భావిస్తున్న వారికి అలర్ట్. తమిళనాడు, పోచంపల్లిలోని ఫ్యూచర్ ఫ్యాక్టరీలో ఉత్పత్తిని తాత్కాలికంగా నిలిపివేసింది ఓలా ఎలక్ట్రిక్. దీంతో ఓలా ఎస్1 మోడళ్ల ఉత్పత్తి తాత్కాలికంగా ఆగిపోనుంది. ఫ్యాక్టరీ ఉత్పత్తి సామర్థ్యం పెంపు, మిషనరీ అప్‌గ్రడేషన్ వర్క్ వంటి కారణాలతోనే ఉత్పత్తిని తాత్కాలికంగా నిలిపివేసినట్లు ఈ విషయానికి సంబంధం ఉన్న కంపెనీ అధికారులు కొందరు వెల్లడించారు. ఈ మేరకు కంపెనీ ఉద్యోగులకు సైతం కంపెనీ ఈ సమాచారాన్ని చేరవేసింది. ఆగస్టు 24, 2023 నుంచి ఆగస్టు 28, 2023 వరకు 5 రోజుల పాటు అన్ని షాపులు పని చేయవని ఉద్యోగులకు తెలియజేసింది. మూడు షిఫ్టుల్లోనూ ఎలాంటి పనులు జరగవని వెల్లడించింది. అయితే, ఆగస్టు 29, 2023 రోజున ఉదయం 6 గంటల నుంచి తిరిగి మూడు షిఫ్టుల్లో ఉత్పత్తి ప్రారంభం అవుతుందని ఉద్యోగులకు పంపించిన నోట్‌లో పేర్కొంది. సర్క్యూలర్ ప్రకారం.. ఫ్యాక్టరీ అడ్మిన్, సెక్యూరిటీ, హెచ్ఆర్ టీమ్స్‌కు మాత్రం విధులు కొనసాగుతాయని తెలిపింది.
ఓలా ఎలక్ట్రిక్ జారీ చేసిన సర్క్యూలర్ ప్రకారం చూసుకుంటే ఆగస్టు 28 వరకు ఐదు రోజుల పాటు తమిళనాడు, పోంచంపల్లిలోని ఫ్యాక్టరీలో ఉత్పత్తి నిలిచిపోయింది. ఇక్కడ ఓలా ఎలక్ట్రిక్ ఎస్1 మోడళ్లు తయారవుతూ దేశవ్యాప్తంగా సరఫరా అవుతున్నాయి. ఉత్పత్తి నిలిపివేయడం వల్ల కస్టమర్లపై ప్రభావం అంతగా ఉండకపోవచ్చని చెప్పవచ్చు. మరో 4 రోజుల్లోనే ప్రొడక్షన్ తిరిగి ప్రారంభం కానుంది. అలాగే సామర్థ్యం పెంచడం, మిషనరీ అప్‌గ్రేడ్ చేయడం ద్వారా మరింత వేగంగా ఓలా స్కూటర్ల తయారి జరగనుందని స్పష్టమవుతోంది. దీంతో కస్టమర్లకు వేగంగా డెలివరీలు చేసేందుకు కంపెనీ ప్రణాళికలు చేసింది.
ఓలా ఎలక్ట్రిక్ ఇంతకు ముందు జులై 21, 2022న ప్రొడక్షన్ ఆపేసింది. ఫ్యాక్టరీ మెయింటనెన్స్, కొత్త మిషనరీ ఇన్‌స్టాలేషన్ కోసం ఉత్పత్తి ఆపినట్లు తెలిపింది. అయితే, ఇన్వెంటరీ పైల్ అప్ కారణంగానే ఉత్పత్తి ఆగిపోయినట్లు పలు నివేదికలు తెలిపాయి. ఫ్యూచర్ ఫ్యాక్టరీలో ఎలా ఎలక్ట్రిక్ 4000 యూనిట్ల స్కూటర్లను తయారు చేసినట్లు తెలుస్తోంది.
ఆగస్టు 15, 2023, ఓలా ఎలక్ట్రిక్ సరికొత్త ఎంట్రీ లెవల్ స్కూటర్ ఎస్1 ఎక్స్‌ను మూడు వేరియంట్లలో ఇండియన్ మార్కెట్లోకి విడుదల చేసింది. 2kWh వేరియంట్లలో తీసుకొచ్చిన వీటి ప్రారంభ ధర రూ. 89, 999గా (ఎక్స్ షోరూమ్) నిర్ణయించింది. అలాగే 2kWh బ్యాటరీ కలిగిన మిడ్ స్పెక్ వేరియంట్ ధరను రూ. 99, 999 గా (ఎక్స్ షోరూమ్) నిర్ణయించింది. అలాగే టాప్ మోడల్ ఎస్1 ఎక్స్ ప్లస్ ట్రిమ్ స్కూటర్ ధర రూ. 1,09, 999 గా (ఎక్స్ షోరూమ్)గా నిర్ణయించింది. ఆయా స్కూటర్లలో అదనపు కనెక్టివిటీ ఫీచర్లను అందిస్తోంది. మరోవైపు.. అదే రోజున భవిష్యత్తులో తీసుకురాబోతున్న నాలుగు ఎలక్ట్రిక్ మోటార్ సైకిల్స్ వివరాలను వెల్లడించింది. అవి డైమండ్‌హెడ్, అడ్వెంచర్, క్రూయిజర్, రోడ్‌స్టర్‌గా పేర్కొంది. వాటి కోసం ఇప్పటికే ప్రీ రిజర్వేషన్ సైతం ప్రారంభించింది. ఆయా ఎలక్ట్రిక్ మోటార్ సైకిళ్లు 2024 చివరి నాటికి మార్కెట్లోకి అందుబాటులోకి వచ్చే అవకాశం ఉంది. తాము మిడ్ లెవల్, ఎంట్రీ లెవల్ మోటార్ బైక్స్ తీసుకొచ్చేందుకు ప్రణాళికలు రచిస్తున్నామని ఓలా ఎలక్ట్రిక్ సీఈఓ భవిశ్ అగర్వాల్ తెలిపారు.
