విభిన్న కథాంశంతో బాలీవుడ్ స్టార్ హీరో అక్షయ్ కుమార్ నటించిన ఓ మై గాడ్ చిత్రం 2012లో సూపర్ హిట్ అయింది. వేరే భాషల్లోనూ ఈ సినిమా రీమేక్ అయింది. ఇప్పుడు 11 ఏళ్ల తర్వాత ఓ మై గాడ్ సినిమాకు సీక్వెల్ చేస్తున్నాడు అక్షయ్ కుమార్. ఓఎంజీ 2 (ఓ మై గాడ్ 2) పేరుతో ఈ చిత్రం ప్రస్తుతం రూపొందుతోంది. ఇప్పటికే వచ్చిన ఫస్ట్ లుక్ ఈ చిత్రంపై ఆసక్తిని విపరీతంగా పెంచింది. కొంతసేపటి క్రితం ఈ సినిమా నుంచి టీజర్ ను రిలీజ్ చేశారు.
ఖిలాడీ ఫాన్స్ కి కిక్ ఇస్తూ OMG 2 టీజర్ ని అక్షయ్ కుమార్ సోషల్ మీడియా అకౌంట్ లో పోస్ట్ చేశాడు. ‘ఈశ్వరుడికి ఆస్తికుడు .. నాస్తికుడు అనే భేదం లేదు .. ఆయన అందరినీ సమానంగానే చూస్తాడు .. శరణాగతి చేసినవారిని తప్పక రక్షిస్తాడు’ అనే కాన్సెప్ట్ తో ఈ సినిమా రూపొందినట్టుగా తెలుస్తోంది. నిమిషమున్నర మాత్రమే ఉన్న ఈ టీజర్ లో అక్షయ్ కుమార్ శివుడిగా, పంకజ్ ఆయన భక్తుడిగా కనిపించాడు. సోషల్ మెసేజ్ ఉండే ఎలిమెంట్ ని కచ్చితంగా సినిమాకి కలుపుతారు కానీ అది టీజర్ లో అయితే చూపించలేదు.
అక్షయ్ కుమార్ లాంగ్ హెయిర్ తో కొత్తగా కనిపించాడు, టీజర్ కి బ్యాక్ గ్రౌండ్ స్కోర్ బాగా కొట్టారు. అందుకే అక్షయ్ కుమార్ కనిపించిన సమయంలో మ్యాజిక్ వర్కౌట్ అయ్యింది. ముఖ్యంగా టీజర్ లో అక్షయ్ కుమార్ ఒక ఇంటి నుంచి బయటకి నడుచుకుంటూ వెళ్తుంటే, ఆయన వెనక నంది ఫాలో అయ్యే షాట్… టీజర్ కే హైలైట్ గా నిలిచింది. ఇక పంకజ్ త్రిపాఠిలో అమాయకపు పాత్ర ఛాయలు స్పష్టంగా కనిపిస్తున్నాయి. మరి ఈ భక్తుడికి వచ్చిన ఏ కష్టాన్ని తీర్చడానికి శివుడు కైలాసం నుంచి దిగి వచ్చాడో చూడాలి.
ఆ మధ్య అక్షయ్ కుమార్ కథానాయకుడిగా చేసిన ‘ఓ మై గాడ్’ సినిమాకి మంచి రెస్పాన్స్ వచ్చింది. ఆ సినిమాలో శ్రీకృష్ణుడిగా అక్షయ్ కనిపించాడు. ఇప్పుడు ఆ సినిమాకి సీక్వెల్ గా ‘ఓ మై గాడ్ 2’ ప్రేక్షకుల ముందుకు రావడానికి రెడీ అవుతోంది. ఈ సినిమాలో అక్షయ్ కుమార్ ‘ఉజ్జయిని మహాకాళేశ్వరుడు’గా కనిపించనున్నాడు. రీసెంట్ గా ఈ సినిమా షూటింగు పార్టును పూర్తిచేసుకుని, మిగతా పనులను జరుపుకుంటోంది. అక్షయ్ కుమార్ – అశ్విన్ వర్దే కలిసి నిర్మించిన ఈ సినిమాకి, అమిత్ రాయ్ దర్శకత్వం వహించాడు. ‘ ఓ మై గాడ్’ లో పరేశ్ రావెల్ ముఖ్యమైన పాత్రలో కనిపిస్తే, ఈ సినిమాలో పంకజ్ త్రిపాఠి కీలకమైన పాత్రలో కనిపించనున్నాడు. ఆగస్టు 11న విడుదల కానున్న సన్నీ డియోల్ మూవీ గాదర్ 2తో బాలీవుడ్ బాక్సాఫీస్ వద్ద ఓఎంజీ 2 తలపడనుంది. ఆరోజే రిలీజ్ కావాల్సిన యానిమల్ వాయిదా పడడంతో పోటీ కాస్త తగ్గింది.
