చంద్రయాన్-3 ప్రయోగం విజయవంతం కోసం ఇస్రో ఛైర్మన్ సోమనాథ్ పూజలు నిర్వహించారు. సూళ్లూరుపేటలోని గ్రామ దేవత శ్రీ చెంగాళమ్మ దేవతకు సోమనాథ్ ప్రత్యేక పూజలు జరిపారు. రేపు చేపట్టనున్న చంద్రయాన్-3 ప్రయోగం విజయవంతం కావాలంటూ అమ్మవారిని ప్రార్థించారు. గురువారం మధ్యాహ్నం 1:05 నిముషాలకు చంద్రయాన్-3కు కౌంట్‌డౌన్ ప్రారంభమైంది. శుక్రవారం (రేపు) మధ్యాహ్నం 2-35 గంటలకు చంద్రయాన్-3 రాకేట్ ప్రయోగం నిర్వహించనున్నారు. చంద్రయాన్-1, చంద్రయాన్-2లకు భిన్నంగా సరికొత్త సాంకేతిక పరిజ్ఞానంతో చంద్రయాన్-3 ప్రయోగం నిర్వహించనున్నారు.
ఇందుకోసం భారత అంతరిక్ష పరిశోధన సంస్థ ఇస్రో అన్ని ఏర్పాట్లు చేసింది. చంద్రయాన్-3 విజయవంతం కావాలంటూ ఇస్రో చైర్మన్ డాక్టర్ సోమనాథ్ సూళ్లూరుపేట చెంగాలమ్మ ఆలయంలో ప్రత్యేక పూజలు చేశారు. రాకెట్ నమూనాను చెంగాలమ్మ అమ్మవారి ముందు ఉంచి, ప్రయోగం సాఫీగా జరగాలని ప్రార్థించారు. అనంతరం మీడియాతో మాట్లాడుతూ, ఈసారి చంద్రయాన్ ప్రయోగం సక్సెస్ అవుతుందని ఆశిస్తున్నామని తెలిపారు. రోవర్ చంద్రుడిపై ఎలాంటి అవాంతరాలు లేకుండా దిగుతుందని భావిస్తున్నామని వివరించారు. కాగా, చంద్రయాన్-3 రోవర్, ల్యాండర్ లను ఎల్వీఎం-3పీ4 రాకెట్ మోసుకెళ్లనుంది.
అలాగే తిరుమల శ్రీవారిని కూడా ఇస్రో శాస్త్రవేత్తలు దర్శించుకున్నారు. శుక్రవారం చంద్రయాన్-3 రాకెట్‌ను నింగిలోకి ప్రవేశపెట్టనున్న నేపథ్యంలో ప్రయోగం విజయవంతం కావాలని శ్రీనివాసుని మొక్కుకున్నారు. ఇస్రో డైరెక్టర్ ఏకే పాత్ర, వీరముక్తివేల్, కల్పన స్వామివారిని దర్శించుకున్నారు. ఈ సందర్భంగా రాకెట్ నమూనాను స్వామివారి పాదాలవద్ద ఉంచి ఆశీర్వాదం పొందారు. శాస్త్రవేత్తలకు ఆలయ అధికారులు స్వామివారి వస్త్రంతో సత్కరించి.. తీర్థ, ప్రసాదాలు అందజేశారు.
